nutri-bun asin mantikilya

marhay na aldaw sa gabos. ma-wot ko na nasa marhay kamong kamugtakan - harayo sa sakit asin kadipisilan sa buhay. marahay-rahay an sildang kan aldaw sa luwas. atyan malakaw-lakaw ako sa luwas. pero bago iyan narumduman ko so ulay-ulay mi ni yong sa chatroom. saro sa mga napag-istoryahan mi iyo an manungod sa eskwelahan na pig-adalan mi kan elementary. cabagnan elementary school.
dai ko malilingawan 5 aldaw sa semana - magpoon lunes hanggang byernes - kada recess gabos na estudyante magpoon grade 1 hanggang grade 6 saro sana an pigkakakan para sa recess. Nutri-bun na pinalamanan ki mantikilya. Makabasog an sarong nutri-bun mala ta dai ko ngani nauubos an sarong pidaso. An gibo ko pigbabanga ko sana an tinapay - an kabanga kikaon sa recess tapos an kabanga iuli ko sa harong.

bitoon

marhay na aldaw (o bangui) sa gabos. bakante pa ako hanggan sa abril 3 - pwedeng apudon na bakasyon grande ako sa eskwela. kasu-udma nag-chat kami ni yong. na-i-istorya sakuya na nabasa nya na so librong 5 people you will meet in heaven (pasensya na ta gari dai pwedeng i-bicol ko iniong titulo kaining libro). may parte duman sa libro sabi ni yong na nabanggit an pilipinas. mala ta igwa daang sarong character duman sa libro na an ngaran tala. sabi ko man ki yong gari sa bicol BITOON iyan.
narumduman ko kan aki pa ako magayonon na pag kapamanggi pagkatapos maghugas kan mga pinggan maruluwas kami kan mga kakawat tapos makarawat ki taraguan. lalo na kun dulom an nagtataong liwanag mga saraditon na bitoon na gari baga aninipot an liwanag. pagparagal na kan taraguan iristoryahan naman. ano daw ta an napipiling pag iristoryan mga gadan o mga kalag mga taud-taud pa kaiyan paurumbasan na iyan pauruli ta tarakoton na...

kwaresma

marhay na aldaw sa saindo gabos. ma-wot ko na nasa marhay na kamugtakan an lambang saro sa saindo. sabi ngani kan mga gugurang "harayo sa sa-kit."
kasu udma pigselebrar kan mga katoliko an pagkabuhay liwat ni kristo. saro sa mga dakulang aldaw kan kwaresma. kan byernes santo nagsimba man ako pigsisirimbahan kan pinoy digdio sa geneva. makangalas na sa legazpi dai ko man inio piggigibo na mag simba sa byernes santo ta panoon baga pirmi an simbahan pero digdio na inganyo ako na magsimba...enewe maliban sa diit an nagsirimba pareho man baga an piggibo digdio...pigtarakloban so mga imahen ki violet na tela tapos daing dakul na tsetseburitsi lalo na so choir simpleng mga kanta sana an pigkaranta.

dignos

marhay na aldaw mga pag-iriba. naghahagad ako ki pasensya sa saindo ta dai ako nakapag surat kaso hapon. nalingawan ko sa kakadaldal kara yong buda ki lucy.
dignos- iyo dai ka nasasala sa pigbabasa mo na nakasurat sa title kan blog na inio. sa mga nakakalingaw na an dignos sadit iniong bayong - ordinaryohon inio mala ta nanlingawan mo na ngani kun ano inio. si cynthia kaipuhan pa na mag apod sa saiyang tugang sa rawis, legazpi city nganing sanang ihapot kun ano an apod sa bayong na maya sa bicol.
balikan ta an dignos. sditin ining bayong. an kolor kan balukag abo na namumula-mula sa parteng payo asin daghan. an tuka halipot pero mapanas. pag tinuka ka kainio pwedeng malugadan an saimong guramoy. problemado an mga paratanom lalo na sa panahon kan pag ani kan paroy ta pabiritong kaunon kainio an paroy. sa panahon na madali nang anihon hanggang sa paggango kan paroy dakula an problema para sa mga paratarok an dignos.
muyahon ko an dignos ta magayonon na pagdangogon an huni kainio. gari baga sultero na nagtatagoy (pwede man tagoy kan daraga).

si kurdapyo

dios marhay na aldaw sa mga pag-iriba. mapamidbid muna ako sa saindo. ako palan si kurdapyo. ipinangaki sa syudad kan legazpi sa probinsya kan albay sa taon 1966. oktubre 29 an sakuyang kaaldawan. gurang na hade? mala ta lampas na sa kalendaryo an sakuyang edad. pero sabi ngani kaan kan mga gugurang karabaw sana an nag gugurang. marhay rahay pag isipon na totoo mananggad inio pero dai man mahahale an katotoohan na sa kada aldaw na maghampang ako sa salming nadadagdagan baga an pligis sa sakuyang pandok maski ngani an sakuyang buhok maitom pa man gayo.

an kapinunan

sabi kan mga gugurang kaidtong bako pa uso an pagsulot ki shorts gabos daang bagay digdio sa ibabaw kan mundo pinangaranan na kan kaglalang. dakulaon ining kangalasan sa sarong aki na kaipuhan na maaraman an ngaran kan gabos na bagay o tawo o hayop naheheleng man o dai na nakapalibot sa saiya. narumduman ko inio ngunyan na kaipuhan na pangaranan ko man iniong sakuyang ginibong "blog". enewe pagpasensyahan kun bago man bagong ngaran an naisip ku na itao sa sakuyang "blog". mga (h)istorya - pwede man na silent h an pagbasa nindo kan titulo. sa gabos na makakabasa kainio pagpasensyahan man kun an bikol na piggagamit ko may mga halong ingles o tagalog. welkam an siisay man na magpaabot ki suhestyon lalo na sa bikol na piggagamit sa "blog" na inio.